2na Fronteira - Conservatorio Superior Vigo

O dúo 2naFronteira, formado pola galega Carmen Penim e o romano Maurizio Polsinelli supón unha proposta musical de calidade e orixinalidade no actual panorama musical galego. A composición, tanto de temas propios como de música para poesías de autores recoñecidos, viaxa sempre entre a linguaxe musical culta e a música tradicional. O longo da súa historia levan musicalizado os poemas galegos de Lorca, textos de Paz Andrade, Curros, Celso Emilio, etc. Os concertos de 2naFronteira nunca deixan indiferente o público, pola gran calidade na execución, e a paixón e corazón cos que os músicos se poñen no escenario. Isto, unido á beleza das melodías que compoñen, e á beleza das palabras dos textos, fai deste concerto unha experiencia imperdible para todo amante da música de calidade e da nosa literatura.